مارأيك فى استغاثة ايمن نور بأمريكا

مارأيك فى استغاثة ايمن نور بأمريكا
طبعا كلنا او كتير منا قرأ الخبر اللى اتعرف فى وسائل الاعلام من فترة مش كبيرة ..عن السيد المحترم ايمن نور رئيس حزب الغد سابقا وثانى انتخابات الرياسة المصرية والسجين بالسجون المصرية حاليا بتهمتة التزوير ..وايا كان هو برىء بجد ولا مذنب مش دى قضيتنا لان البلد فيها قانون وقضاه محترمين وفاهمين شغلهم اكتر من اى حد ...بس اللى لفت نظرى ان رجل عنده مبادىء وفكر تحررى وبيدور على استقلال بلده وحرية فكرها يوصل بيه الحال انه يبعت رساله للرئيس الامريكى ويقوله انه سجين لمجرد انه قال رايه او ان النظام الحالى برئاسة مبارك رفض انه يخلي لايمن نور وجود فى الساحة السياسية لمجرد انه تجرأ ودخل انتخابات الرئاسه وبالفعل خد المركز التانى فى الاصوات ...تفتكروا ده تصرف سليم من شخص فاهم سياسه او عنده مبدأ بيحب بلده؟ ايا كان البلد قسيت عليه او اشخاص ظلموه وسجنوه ...ده طبعا لو كان فعلا مظلوم ..وانا عن نفسى ماعتقدش وانه فعلا زور ...المهم مش دى القضيه برضو القضيه هى ازاى يارجل ياوطنى تدخل امريكا اللى بتتلكك لمصر على اى موقف عشان تخرجك من سجنك ؟ ازاى توصل لمرحلة من المراحل تتخلى فيها عن مبادئك وتنسى دورك القيادى اللى كنت تنادى بيه من حرية واستقلال عن الاحتكار والشعارات اللى طلعت بوقين على مافيش مقابل انك تخرج من السجن فى قضية يمكن تكون فعلا ارتكبتها ؟ مش شايف ان دى خيانه ياسيادة القائد؟ والله انا بحمد ربنا انك سقطت فى الانتخابات ورغم انى اديتك صوتى الا انى كنت هزعل اوى لو كنت بقيت ريس وبعتنا فى اول مزاد لامريكا ...عموما انا قلت رائى فى حضرته وبقول انه متسلق ومدعى الوطنية والحكاية كلها كانت فرقعه وجعجعه عشان يوصل للحكم ودلوقتى عايز رايكم بكل صراحة الراجل ده بالفعل اللى عمله حتى ولو كان مظلوم ينفع وهو رمز فى البلد يبعت رسالة استغاثه للامريكان ويقولهم تعالوا مصر وادخلوها وطلعونى ده انا مظلوم والنبى ؟
قول رايك برد من الردود دى وبعدين علق التعليق اللى انت عايزه